الى عبدالمهدي: “وروح ابوك هاي السوالف بعد ماتمشي ولا توكل خبز”

اخبار العراق: كل هاي السوالف بعد متاكل عدنه .. تبوس العلم، تبــــوس شباج الكاظم، ما تصافح شذى سالم، توزع لفات بموكب السبطين، تلبس عرقچين، تمشي للحسين ..، هاي العراقيين يسموهه دروب واللي يسويهه يسموه أبو درب
هاي السوالف بالـ2004 و 2005 چانت تمشـي علينه وتشتغل عدنه، وچنه من نشوفهه نشبع بچي من گد الفرح والنعمه اللي الله انـعــم بيهه علينــــه بحكام يملؤون الارض قسطا و عدلا بعدما ملئت ظلما وجورا ..

لكن بعد ماجربناكم، وشفنـه سوالفكم .. گمنه بعد من نشوفهه منكم نسلم عليكم ونگللكم “سولفوهه للدُبة”.
اشتغل وبس ..
اشتغل وخلي نشوف شغلك ..
روح شوف الجرحــى اللي طارت عيونهم، وراحت اديهم ورجليهم في سبيل هذا العلم ..
روح لعوائل الناس اللي لفوهم بهذا العلم ..
روح أنصف المتقاعدين الي ضحوا بالغالي والنفيس من اجل هذا العلم
روح شوف حال الطلاب بمدارس الطين اللي مايرهم عليهه علم ..
روح شوف البوگ والنهب بدوائر تشتغل وترفع هذا العلم !!
روح شوف محافظات عراقية ترفع غير هذا العلم ..
روح خلص الوادم من عصابات بزبانة ما تشتري هذا العلم ..
روح وفر فرص عمل لشباب يتوسلون لخدمة هذا العلم ..
روح شوف ناس گاعدين بالچول والخيم من وره هذا العلم ..
روح افتح مصانع ومعامل تنتج بضاعه عراقية عليهه هذا العلم ..
خلو الله بين عيونكم سيدي ….. ولو دامت لغيرك ما وصلت اليك …….

وكالات

428 عدد القراءات
0 0 vote
Article Rating
Posted in رئيسي, سياسة.
Subscribe
نبّهني عن
guest
0 تعليقات
Inline Feedbacks
View all comments