خفايا الفساد والرشاوى في شبكة الاعلام العراقي

اخبار العراق: رصد المحرر لصفحة محمد هيجل:

قبل ست سنوات موظف مغمور يريد يسوق نفسه يم رئيس الشبكة ويطيح بمدير القناة فيصير أبو الحريص ويقاتل حتى يضارب بالأسعار ويجبرني انزل سعر المباريات الى الربع ويخليني لليوم اطلع من دين أطب بدين .

– واذا داعش احتلت ثلث البلد وصار تقشف والمباريات لازم تنقل حتى ننطي رسالة إيجابية عن الوضع فلازم براسي ولازم اصرف وأنتج المباريات على حسابي وانطي القنوات مجانا لان العراقية ماعدهم فلوس .

– واذا رئيس الشبكة السابق يكره مدير القناة يروح يجيب زميل اخر ويكله اشتغله واخليك مدير بمكانه ومن يشتغله ماكو غير إتهامه بالفساد واكيد براسي لان القناة تتعامل مع شركة وحيدة وهي شركتي .

– واذا مدير قناة يريد يسوي قناة HD وما عنده فلوس فيروح يتحايل مع العقود حتى يلوون يذراعي ويجبروني ويسوون عقد تعسفي ويحجزون فلوسي حتى براسي يسوون قناتهم اجدي .

– واذا مدير طلعوه من منصبه وان كان ظلماً فحتى يفشل عمل القناة والإدارة الجديدة الي بعده يروح للأمناء ويكلهم طلعوني لان اكتشفت فساد وهم براسي وما غاثني بالموضوع الا انه هذا المدير الي نجح ساندته بكل قوة وكنت عنصر خفي في نجاحه وهذا ما ذكره بكل لقاءاته .

– واذا واحد من الأمناء يكره رئيس الشبكة ويريد يطلعه من منصبه فماكو غير عشتار وهم براسي .

– واذا الموازنة ما مقرة لازم اني انطي المباريات للشبكة على مسؤوليتي ومن دون عقد واحمل نفسي مجازفة قانونية قد تهدم مشروع كان العراق يحلم بيه .

ما زاعجني الا شي واحد بس وهو كل المسؤولين الي كانوا يتهمون بعض بالفساد ما ضاجوا ولا انتفضوا ويوم يخربون ويوم يتصالحون ومششوا الموضوع طبيعي واني الي ضايج مو همه لان اني عندي بقيمي الراشي افسد من المرتشي وما اقبل واحد يتهمني بالباطل.

شبكة الاعلام عراق مصغر بكل مشاكله ومع الأسف قدري أن أعاني واني اشتغل بيها كموظف وأعاني واني صاحب شركة ابيعلها مباريات ، بس ما كاسر ظهري غير الجمهور الي ما اريد أخذله والي وقف معاي واشاد بالمنجز العظيم الي سويته للوطن وحملني مسؤولية جبيرة .

على الأرجح ستأخذ قناة الوطن استراحة لهذا الموسم لتعيد ترتيب اوراقها عسى ولعل ان تستطيع الشبكة تفضيل المصلحة العامة على مشاكلها الداخلية، ناجح حمود كان يعاني الأمرين من الشبكة وفعل ذلك في موسم 2013/2014 واعطى الدوري لوار ، موسم واحد أبعدت العراقية عن الدوري لتنطلق ثورة في النقل التلفزيوني في العراق وتكون عنصراً رئيسيا في رفع الحظر وإسعاد ملايين العراقيين، ما رأيكم في تكرار هذه التجربة لموسم اخر وانا اضمن لكم مكاسب عظيمة بعدها واولها ادخال الفار وكذلك تغيير سياسة الدولة بالتعامل مع الجمهور الرياضي وإعطائه ما يستحق ..

هذا الدوري احتمال كبير النقل يكون على قناة عربية فقط وستكون قناة الوطن في استراحة مؤقتة ، بالوحدة انطيكم الموقف

26 عدد القراءات

اترك تعليق

avatar
  Subscribe  
نبّهني عن